Temos unha explotación de fungos e pequenos froitos do bosque nas inmediacións do concello de Melide, en pleno corazón de Galicia, e lugar de paso de milleiros de peregrinos no seu percorrido a terras de Compostela. A nosa produción conta cunha inmellorable situación para o cultivo natural de diversas variedades de fungos e froitos do bosque, como framboesa, grosella, mora e fresiña. A riqueza da terra e as condicións climatolóxicas da zona permiten que os produtos sigan un proceso natural de crecemento, respetuoso co medio ambiente. Para garantir a calidade da produción só utilizamos as nosas propias plantas.